【難頂病人無罩咳嗽】遇鄰座乘客公然「採礦」 葉德嫻：講起都核突 – 香港蘋果日報

影后葉德嫻（Deanie姐）最近接受運輸署聯同港鐵及巴士公司邀請，拍攝一條3分鐘的宣傳片，全程「Mean爆」無禮乘客，推廣「搭車顧自己，都要顧人哋」的訊息，提醒大眾注意乘車安全和禮貌。

相關新聞：Deanie姐3分鐘寸爆12無禮客 籲搭巴士港鐵顧己及人

原來Deanie姐都試過「身受其害」，曾搭港鐵時遇到無禮乘客，她接受《蘋果》電話訪問列數多宗罪：「多得很啦，譬如話女士，好多女士長頭髮，喺人多時會揈頭，唔會理後面有冇人，佢會突然間揈頭，我想問佢用邊隻護髮素？點解啲頭髮咁硬呢？佢就矋吓我囉；仲有啲人紥類似古裝嘅道士馬尾，喺地鐵或巴士裏面，你擺嚟擺去就會掂到人，其實應該要顧及其他人，你唔係搭緊私家車，你搭緊係公共汽車。」

Deanie姐覺得最難接受，就是有病唔戴口罩：「後生或老嘅女人同男人都有嘅，例如唔掩口喺度咳、打乞嗤，有啲人仲咳到聽到有好多痰喺肺度，佢哋好似仲唔覺得呢啲係問題，反而覺得你應該可憐我：『我咳呀！』呢啲咁討厭嘅嘢囉，有陣時睇到呢啲人，你會覺得：乜嘢人種嚟㗎？係我哋香港人種嚟咩？」

Deanie姐越講越勞氣：「又例如有啲人坐喺度蹺腳、伸隻腳出嚟嗰啲，你諗吓地鐵個位有幾闊呢？如果你同佢講：『小姐／先生，麻煩你唔好蹺腳，畀番少少位嚟！』咁佢又會畀說話你聽：『咁我生得高嘛！』我話：『如果你瞓喺度仲高！』你會睇到有呢啲情形出現，仲有好多，反而最多見到係男人撩鼻屎，仲要抆出嚟有少少鼻涕黐住嗰啲，講起都核突，呢啲都係我親眼見，我正想攞紙巾畀佢時，佢可能唔知彈咗去邊，呢個我冇出聲，因為真係太過尷尬，有啲女人好得人驚，生得好靚、手甲搽到好靚，都喺度撩㗎，呢啲係好難頂。」

眾所周知港鐵車廂內不准飲食，Deanie姐就曾直斥違規乘客：「有個大肥佬夾銀包喺胳肋底，佢喺度開樽水飲，我行埋去同佢講：『先生，地鐵唔可以飲食。』就畀佢睥我啦，鬧我死八婆乜乜乜，我唔理佢認唔認到我，可能我戴咗口罩，平時我都會戴口罩，因為空氣污糟。變咗佢會惱羞成怒鬧我，唔緊要嘅；亦見過兩個小朋友同父母坐一行食麥當勞，我行埋去同佢講：『太太，地鐵唔可以飲食。』佢話：『咁細路仔肚餓吖嘛！』我惟有話：『好呀，你教得好！』」Deanie姐一口氣再數：「有啲關愛座，有啲人唔會讓座畀婆婆坐，閤埋眼扮瞓覺，仲有啲離譜到企喺輪椅位，啲輪椅上到嚟佢哋唔行開，等輪椅嗰個人蕩嚟蕩去，我出聲：呢個係輪椅位，佢哋眼超超。」

Deanie姐坦言：「呢啲我其實好失望，人嘅質地可以低到咁樣，都係大人大姐，唔係細路哥，睇到呢啲你會覺得：弊啦！弊啦！我哋個係乜嘢社會，有啲咁嘅人出嚟！」

問到有網民提議拍埋國語版給大陸人看，Deanie姐說：「我覺得咁樣唔啱，你可以配音，但配得國語就要配埋英文，因為我認為並非大陸人係咁，我哋香港人都唔差㗎，我哋香港人都好厲害，同大陸人有得比，大家都係衝入車去霸位，絕對唔可以話嗰啲只係大陸人，當然大陸人都有離譜啲嘅，譬如鋪張報紙就畀細路哥小便，佢嘅文化背景唔同，我覺得要做多啲宣傳，每個交通工具都要做，地鐵、巴士都要做多啲宣傳，其實唔可以一面倒怪乘客，有啲可能乘客唔知，譬如梅窩船可以飲食，但愉景灣船係唔得，所以要做多啲宣傳，我覺得咁樣先公道。」

精選娛聞，喺晒《娛果》
http://fb.com/appledailyent

第二屆最港電影大獎投票網址
https://bit.ly/thekongestfilmawards2018

10萬蚊 100人分！
星期一至五晚上10點半
《動腦Q》Let’s Q the money！
http://bit.ly/2QW8LcI

Original Article